E por fin publicamos a nova máis importante de toda a semana, que aínda que tod@s coñecemos xa a través das nosas RRSS, hoxe amosamos aquí a crónica completa. O éxito dos nosos nadador@s seleccionados co Equipo Nacional de Augas Abertas no Campionato de Europa en Croacia a semana pasada. Mateo García e Paula Otero voltan con un traballo moi ben feito, novas citas internacionais importantes e unha medalla.
Este Campionato celebrouse nunha excelente localización, en Stari Grad, en Croacia, dende o mércores 28 ata o sábado 31 de maio. Mateo e Paula viaxaron como parte da selección española absoluta, formada por cinco deportistas.
Mateo García, o máis mozo da convocatoria, que se estrea esta tempada como absoluto en Augas Abertas, fixo un gran papel rozando o Top-10 nas tres probas que nadou, peleando cos máis grandes desta modalidade. Acadou o 13º posto en 10K, o 12º en 5K e o 13ª da semifinal no Knockout Sprint.
Paula Otero obtivo postos moi destacados nas tres probas do evento. Empezamos pola proba de 10K, que era clasificatoria para o Campionato do Mundo, nesta proba Paula acadou o 6º posto, sendo ademáis a primeira nadadora española. Ó día seguinte, na proba de 5K quedou no 5º posto. E o mellor chegou o último día, na novedosa proba de Knockout Sprint, proba na que se nadan tres distancias onde se van eliminando deportistas. As distancias son 1500 na eliminatoria, 1000 na semifinal e 500 na final. E a esta final chegou Paula, acabando con unha impresionante carreira na que se colocou en 2º posto dende a saída, e foi quen de mantelo, proclamándose Subcampiona de Europa desta proba.
